政情：黃傑龍正宗芬蘭浴度佳節
聖誕節有乜節目？各適其適啦！叙福樓集團執董黃傑龍（Simon）就去咗沖芬蘭浴，仲係正宗嘅芬蘭浴喎。點為之正宗呀？
話說Simon日前同太太、囡囡一家三口去芬蘭，第一日就去咗享受正宗芬蘭浴，喺零下十三度嘅氣溫之下浸溫泉，之後仲去咗一個用冰造嘅桑拿房，又坐咗雪狗拉車，玩完之後啲狗狗仲好黐人，要人同佢哋玩，Simon大讚非常可愛。
最搞笑係佢同囡囡去北部聖誕老人村探「真·聖誕老人」時阿女仲問聖誕老人點解次次都唔同樣，聖誕老人話因為次次浸完芬蘭浴後個樣就會唔同咗喎！
追蹤極光影靚相
Simon仲話當地只有約兩小時嘅日光，分唔清楚係日出定係日落，佢特登下載咗三個專業嘅極光指數追蹤手機App，追蹤咗三日之後，終於喺冬至正日見到極光，雖然佢覺得專業相機太重所以今次只係帶咗「高級傻仔機」去影，但以佢二十五年影相相齡，影出嚟啲相都係好靚。
_