中環出更：男兒身 女童軍「豪」言游慣冬泳
放假除咗食飯睇戲，去郊外露營都係一個唔錯嘅選擇。香港女童軍尋日舉辦「百年童創新紀元國際大露營」活動，逾千名來自不同國家嘅青少年參與，喺荃灣青龍頭民眾安全服務隊圓墩營地露營，體驗大自然環境同氣氛。卓妮見一眾女童軍當中有一名男士，就係副會長王賜豪，問佢點解會加入成為「女」童軍一分子，原來係因為佢有個中學老師介紹，加上佢覺得男女愈來愈平等，男童軍都有女仔啦，所以佢加入女童軍做副會長幫手都冇問題。
王賜豪又話依家唔單止男女漸趨平等， 女士嘅體格亦都好強，見一班年紀輕輕嘅女童軍落手落腳幫忙，佢都唔輸蝕，決定唔乘搭大會嘅專車，自己行路落山當做運動。佢仲話平日經常都會游早水，就算冬天都一樣照游，話一年四季裏面春天嘅水比冬天更凍，不過最初都係要啲勇氣嘅，佢就搵埋泳會啲朋友一齊游水，其他人落晒水自己冇理由唔落㗎嘛，習慣咗後反而唔游唔舒服喎！
見女童軍香港總監李周美枝同啲學生有傾有講，佢話十幾歲已加入女童軍，咁多年嘅露營經驗入面最難忘嘅一次係帶隊去北京一個營地，但因天氣惡劣航班無法降落，輾轉去咗另一個地方，加上空中服務員換班，最後佢哋要臨時做埋空姐嘅工作，派餐兼照顧同行者。
彭徐美雲盛讚野外訓練
講起現時好多人鍾意行山，副會長彭徐美雲認為女童軍嘅訓練非常好，事關佢哋會按唔同能力及等級分成好多隊小組，因應隊員能力作唔同難度的培訓，逐級逐級上，減低危險之餘仲可以培訓一班女童軍點樣適當評估野外風險，對行山會有幫助。
卓妮