政情：巫成鋒與「娥」有個約會
今年九月參選立法會新界東區嘅陳玉娥（娥姐）曾經要求同立法會議員楊岳橋合照，佢哋兩個嘅合照「娥頸橋之戀」喺網上瘋傳同被改圖。原來除咗楊岳橋，娥姐同屯門區議員巫成鋒（Rex）都有段古，Rex更獲娥姐邀請外出。睇嚟娥姐同啲年輕議員特別投契。
娥姐之前邀請Rex出席一個電台節目齊齊論政，至於點解會邀請Rex，佢就話因為娥姐曾經住喺佢所服務嘅地區，所以早喺幾年前佢仲做緊社區主任時兩人已經認識，娥姐當年更不時去辦事處搵佢添，計落佢哋都算識於微時。
娥姐參選時冀得Rex支持
Rex又話，娥姐決定參選立法會時都有同佢講，希望得到佢支持，而娥姐選舉揚名後，更曾WhatsApp轉發自己嘅報道畀佢。被問到同娥姐依家仲有冇聯絡，Rex就耍手擰頭話冇喇。唔知Rex咁講會唔會傷咗娥姐心呢？
Rex同楊岳橋都係八十後，兩個都算係比較後生嘅從政者，睇嚟娥姐同啲年輕議員都特別啱嘴形喎。