政情：嚴煥兒 袁正 聯手搞飲食平台Apps
城中年輕人都鍾意參加青年組織，事關可以搵到志同道合嘅好友。香港青年聯會會董袁正（Jake）及會員嚴煥兒（Mona）等一眾手足，早前就成立咗一個名為「好時光」嘅飲食平台，透過手機應用程式（Apps）籌辦小型特色美酒佳餚宴，例如古威士忌宴、紐西蘭花膠海蔘宴等，食得夠晒刁鑽，結果大受歡迎。
本身係會計師嘅Jake依家喺家族會計師樓幫手，平時好鍾意搵好嘢食。佢話開設呢個飲食平台嘅主意來自台灣，事關有次佢喺當地參加過一次小型餐飲活動，覺得好得意，又可以結識朋友，所以就夥拍幾位好友一齊小試牛刀，一方面當係創業，另一方面又可以祭吓五臟廟。
Mona笑笑口話，佢哋曾經同一間紐西蘭花膠入口商合作，提供八道菜都係花膠嘅盛宴，每人只需盛惠七百蚊，真係平到笑，不過個個都食到怕怕，有人笑稱半年都唔敢再食花膠添！