政情：盧金榮報佳音 扮吹色士風
聖誕節街上唔少人報佳音，菁英會主席盧金榮早前就同一班小朋友喺旺角街頭報佳音。見盧金榮拎起支色士風似模似樣，其實佢只係學過拎冇學過吹，笑言以前試過吹長笛吹唔出聲，又試過拉小提琴覺得太困難，結果學鋼琴總算上手，得閒就彈幾首簡單嘅歌氹吓兩個囡囡。
音樂堂慈善基金會創會主席高松傑及張志仁都有到場，事關佢哋同菁英會合作搞過一個音樂義教計劃，免費教吹色士風，當日出席嘅小朋友就係學員。高松傑話學色士風唔係個個家庭負擔得起，一支音色較好嘅色士風動輒過萬元，有菁英會贊助購買樂器，加上老師義務教學，對學生嚟講好重要。而學樂器嘅人最緊要有機會表演，所以就選擇聖誕呢個普天同慶嘅日子表演喇！
陪學生去訓練營冇假放
盧金榮就話，咁多個節日之中最鍾意聖誕，一來有氣氛，燈飾又靚，二來有禮物收。不過佢平安夜就冇假放，要陪學生去西貢參加歷奇訓練營喎！