政情：議助人工比併 易志明出手爽
立法會議員每年可申領二百六十多萬元作辦事處營運開支，用作支付職員薪酬、醫療福利等。上屆立法會中，有多名功能界別議員嘅助理待遇遠比直選議助高，其中以上屆議員劉皇發（發叔）嘅助理月薪高達七萬二千元，最令人嘩然。今屆立法會議員申領開支表陸續出爐，但係至今仲未發現有議員出手豪爽過發叔，但咁高人工又係咪合理呢？
十月曾自掏腰包出雙糧
根據議員申報嘅助理人工進行大比併，發現商界背景嘅自由黨議員助理人工都唔差，好似航運交通界易志明咁，佢所申報三個助理當中，有兩位人工起碼有三萬二千元以上，易志明喺十月份更自掏腰包，出多個月糧畀班助理添，認真唔話得！不過，易志明出手點高，都不及發叔，因為其助理當時月薪接近七萬二千元，同議員月薪只係相差萬幾蚊咋！
本報亦發現一個有趣現象，就係有議員聘請前區議員做助理。好似喺上年區議會選舉中落敗嘅前屯門區議員陳雲生，喺今年五月獲同屬民建聯、同樣來自新界西嘅議員梁志祥聘用，出任顧問一職。雖然職銜為顧問，但人工就好似反映唔到佢嘅經驗，皆因陳雲生月薪只得一萬二千元。
除咗聘請前區議員外，過往都有不少議員偏好聘用社運人士當助理，好似民陣前召集人陳倩瑩、民陣成員陳小萍、學聯前秘書長周澄等社運人士，都曾經擔任過立法會議員助理。今屆都有咁嘅情況，議員朱凱廸就請咗學聯前副秘書長岑敖暉（Lester）做助理。
岑敖暉兼職賺近四千元
Lester曾經做過土地正義聯盟嘅義工，繼而成為朱凱廸助理，現時職銜係研究幹事。不過由九月十六日至三十日，Lester只得三千九百元人工，就算以一個月計算連八千元都唔夠。不過Lester當時仍未畢業，以學生身份能夠搵到幾千蚊都算係咁。早前有傳聞就話，Lester打算畢業之後繼續為朱凱廸工作，未知到時由兼職轉為全職工作，待遇會唔會有所改善呢？