中環出更：從事IT 搞演唱會 吳傑莊跨界別
體育、演藝、文化及出版界（演藝小組）選委吳傑莊（Johnny）雖然早早已經讀完博士，不過佢細個最鍾意嘅電影係《逃學威龍》，正正係因為佢唔敢逃學，惟有睇電影滿足下逃學嘅幻想。
澄清出選演藝小組因由
Johnny一向較為人熟悉嘅係從事資訊科技行業，佢出選演藝小組時亦受到質疑，不過佢解釋話，其實自己搞演唱會已經搞咗好多年，都算係呢個界別嘅人。近年香港唔少電影人興合拍電影，有人擔心以香港人為目標觀眾嘅電影會愈嚟愈少，Johnny就話，合拍片興起都係市場主導嘅結果啫！不過佢都支持以香港人為目標觀眾嘅電影要繼續拍落去喎！
講開睇戲，Johnny諗起以前試過喺過年時睇戲好難買飛，結果成家人一齊坐喺第一行，幾乎係瞓喺度睇戲睇足全場，都咪話唔辛苦。依家就方便好多，有得上網預先訂飛，過年想睇戲都唔使再坐第一行嘞！
卓妮