中環出更：歷史建築變藝術基地 吳錦津有古講
保良局最近喺跑馬地山村道一棟近百年嘅三級歷史建築法式大宅，推出一項青年藝術家駐留計劃，以相宜租金提供本地及海外青年藝術家短期留宿、創作及交流。早前舉行啟動禮時，吸引大批名人去一窺大宅究竟。灣仔區議會主席吳錦津（Stephen）都有到場，佢自細喺區內長大，仲同呢棟大宅有段淵源添！
Stephen話，細個屋企開雜貨舖，佢經常幫手送米、油等貨物去大宅，當時大宅嘅主人係潮州人。雖然佢經常去，但係從來未能行正門入，只能送去後門，行專供下人出入嘅「妹仔樓梯」。今次係佢第一次行正門梯級入嚟，終於一償心願。佢好熟悉咁話，大宅原本仲有另外一半，可惜已被拆卸起樓，如果未拆仲大氣勢添！
依家呢棟物業嘅主人係保良局前主席梁安琪，佢借畀保良局用作推動青年藝術文化發展。保良局主席郭羅桂珍、副主席陳細潔等董事局成員都有到場，郭太話，可以利用此地作為孕育中西藝術文化嘅基地，年輕藝術家一起探討創作，互相激發靈感，相當有意義。
顧東華大讚環境靚
保良局總理顧東華見到咁正嘅住宿環境都羨慕不已，猛讚房間好靚。佢笑稱自己冇乜藝術細胞，就算時光倒流都享受唔到喎！佢話細個時一心想做警察，後來真係考到幫辦，無奈當時仍係港英時代，由於佢屋企同大陸有生意往來，結果無法通過政府嘅審查，最終與成為警察擦身而過，認真可惜。
卓妮