政情：民協換屆抗老 料80後「揸旗」
民協喺今年九月立法會選舉全軍盡墨，該黨打回原形喺立法會零議席，被視為黨「中生代」代表人物嘅莫嘉嫻為敗選負責辭任主席，該黨下周四舉行領導層換屆選舉，並喺日前截止報名，據悉民協換屆有去老人化迹象，因為黨主席、兩名副主席位置未見老將馮檢基等人翻兜報名參選，取而代之係三名「八十後」區議員，包括署任主席、現年三十四歲嘅施德來報名參選主席，兩名深水埗區議員何啟明及楊彧則報名參選黨副主席。
馮檢基譚國僑轉爭中委
據知今次民協主席及兩名副主席均係等額選舉，以上三人很大機會喺無對手下順利當選，當中施德來將成為民協近十年來最年輕嘅領軍人物。至於兩名老將馮檢基及譚國僑，據知二人無意出任主要位置，預料會轉為競逐中委。
施德來接受查詢時無回應係咪接任民協主席，但佢承認，民協內部認同需要改革，要引入新思維，唔可以再抱陳守舊，又透露已成功挽留有意退黨嘅油尖旺區議員林健文，相信林係支持民協改革路線。