政情：事隔兩年 徐子見清走佔中「遺物」

漢奸黎等佔中搞手仍逍遙

話時話，佔中遺留嘅物資喺兩年後都已經清場，但包括壹傳媒黎智英（漢奸黎）等合共四十八名佔領搞手，至今無人因組織非法集會等罪名被起訴，繼續逍遙法外，警方同律政司應該盡快採取行動，唔好再拖。

政總外淪露宿點 地署清場

其實喺佔領行動之後，政府一直對喺政府總部外添美道嘅留守人士或露宿者「隻眼開隻眼閉」，未有處理有關問題，而政總外嘅車道入口不時有人用膠紙貼出支持普選的圖案，而政總公廁外亦有一兩人留宿，物資放滿一地。地政署早前向留宿人士發出「最後通牒」，指佢哋非法佔用政府地，要求佢哋喺尋日之前清理，而當局亦喺尋日完成清場。

東區區議員徐子見尋日喺Facebook發貼，指朋友莫先生收到警民關係科嘅通知，要求佢喺尋日或之前清理現仍留喺金鐘嘅物資，徐子見前晚亦已經將現場的膠椅帶走。據知，地政署職員尋日喺警員嘅協助下已經清走現場嘅膠椅同垃圾，而被佔嘅街道終於喺兩年後正式回復正常。