政情：DQ官司預輸 四議員掠水埋單

四名被司法覆核嘅議員「戴定頭盔」，即使如劉小麗同姚松炎都有樓揸手，早前以案件涉及人權為由，齊齊去申請法援。可能佢哋申請法援都心知不妙，竟然搵嚟佔領行動發起人嘅朱耀明同陳健民，以及民主動力創會召集人鄭宇碩去成立一個「守護公義基金」，初步目標係籌款五百萬元，用作佢哋打官司嘅訟費。

基金無王管 「朱陳鄭」話晒事

呢個基金計劃喺嚟緊嘅元旦同七一遊行期間籌款，到時市民捐畀政黨同團體嘅款項，好有可能強制自動轉移到基金。唔止騎劫市民捐款，基金聲稱由「朱陳鄭」三人全權決定點用，但係邊個可以申請同咩方式支援，全部無交代清楚，只係話所有面對相同問題（司法覆核）嘅議員都可以申請，仲話游梁都歡迎，當中嘅準則真係任佢哋三個噏。其實長毛等四人在宣誓儀式「玩嘢」加料，就要預咗要承擔相關法律責任，依家官司都未打，就巧立名目向市民「掠水」為自己嘅言行埋單，係咪代表佢哋對官司無信心，打定輸數呢？

另外，主打墟市政策嘅劉小麗，原本上星期四喺立法會提出墟市議案，但因身在法庭，缺席會議而無得提出。據了解，民主派同建制派達成共識，將原本排先嘅墟市動議同教育界議員葉建源嘅動議互換次序，等劉小麗可以趕得切返嚟提出動議，然而當日葉建源嘅動議無乜人發言，民主派想「拉布」又唔夠人，結果都係失敗。

劉小麗無料到 墟市團體堅嬲

據悉，墟市團體對劉小麗錯失提出墟市政策議案極為憤怒，認為佢做唔到嘢，準備好將揶揄佢嘅改圖放上網，以示不滿。好彩墟市事宜小組委員會咁啱喺今個星期二召開公聽會，令墟市團體有平台發洩怒火；加上民主派「還債」，坐齊人喺委員會，成功通過三項對墟市商販有利嘅動議，最終先能夠平息風波，無出現墟市團體公開倒戈插劉小麗呢一幕。