中環出更：田二少反退會潮 入委員會參戰
建制同非建制派喺立法會十月復會時協調失敗，兩大陣營紛紛喺各個委員會「冧友」，但隨着時間過去，雙方開戰嘅姿態逐步軟化，取而代之係退出委員會潮，但係有人就反其道而行，就係新民黨副主席田北辰（田二少）嘞！佢喺近日去信立法會福利事務委員會主席邵家臻，提出申請加入委員會，佢仲打正旗號指希望透過民意授權，就扶貧、退保等問題向政府施壓添！究竟所為何事？
田二少係少有具商界背景人士，喺幾年前獲邀加入屬於諮詢組織嘅扶貧委員會，佢接受查詢時話，成班委員可以喺會議上拗到面紅耳熱，各自爭取目標，然而當委員會有決定後，委員就唔可以喺外邊再施壓，令佢覺得「角色上尷尬啲」。
個人第13個委員會或小組
就因為咁，田二少經過一輪思考後，決定申請加入福利委員會，希望喺立法會層面繼續跟進貧窮、扶貧等問題，若成功加入該委員會，將會係佢個人加入嘅第十三個委員會或小組。
田二少話自己喺福利委員會「講乜都得」，加上佢身為民選議員可透過呢個平台向政府當局施壓，又可以喺會上提出動議及投票，如獲得跨黨派支持通過亦會獲得當局重視，咁樣會有一定嘅滿足感。
卓妮