中環出更：無懼中美變改 徐珊雯覓商機
香港品牌總商會（商會）早前舉行聖誕派對，識飲識食嘅會長兼「假髮大王」趙振國請大家齊擦西班牙菜。商家聚首少不免講生意經，商會副會長黃業光話近期美國候任總統特朗普頻頻挑戰中美關係，擔心兩國關係緊張將令業界雪上加霜，但另一副會長徐珊雯就持樂觀態度，認為美國衰退多年，係時候睇番當地有冇商機嘞！
徐指中國經濟發展已趨緩慢，美國亦衰退多年，正所謂「十年河東，十年河西」，佢睇好美國經濟有發展空間，香港品牌可考慮去當地搵機會，又話香港品牌喺市場上一向享有商譽，最重要因素係誠信。咁熟悉美國市場，事關佢曾經喺一間美國鐘錶集團工作，成功令該品牌由原本專做普通跳字錶變成時尚錶，而且雄霸市場。當時佢喺美國時款錶市場幾乎無人不識，依家就自己做鐘錶代理。
王偉食「拖鞋飯」 有感而發
同場仲有生產拖鞋嘅常務副會長王偉就笑稱自己係食「拖鞋飯」喎！王偉有感而發話中國鞋出口佔全世界六成，舊年出口量只係跌咗幾個百分點，但就涉及八億對鞋，可以想像有幾多工廠執笠、工人失業，所以對未來唔敢太樂觀。
轉頭見到中華廠商聯合會生物科技行業委員會主席于常海，本身係科學家嘅佢話香港絕對有希望成為亞洲生物科技中心，最近佢公司就成功研製出改變全世界治療方法嘅基因晶片，例如一個人發燒，只需一小時即可測出乜嘢病菌導致發燒。聽落真係一大福音。
卓妮