政情：公民講場：幼園報名費任攞 教局把關吳得掂

小朋友入幼稚園要面試，有啲仲要交埋報名費。申訴專員公署尋日炮轟由吳克儉（吳得掂）領導嘅教育局，喺幼稚園超收報名費問題上把關不力，令多間幼稚園喺過去八年向每名報名學生收取一千至三千幾蚊報名費，仲形容係「匪夷所思」。公署矛頭直指教育局喺過去八年明知有十六間幼稚園犯規，只向其中一間學校發出警告；批准幼稚園加價嘅制度唔嚴謹、準則又不一、方法粗疏，未了解清楚幼稚園點用筆報名費就批准申請。其實做嘢粗疏、唔嚴謹同標準不一都好切合吳得掂嘅性格，睇怕佢真係要學好生涯規劃，之後搵過第二份工喇！