政情：八網難逃：窩心聖誕禮物 陳克勤收牛屎餅
未到聖誕，民建聯（民記）陳克勤（克勤）就率先收到一份禮物，呢份禮物可謂「別具一格」正常人都好難估到係啲乜？克勤尋日喺facebook分享咗一張好似「心形鵝肝」嘅相片，仲叫大家估下係啲乜嘢，估中就請佢食喎！當大家望到都流晒口水嘅時候，克勤就開估話呢塊其實係「有機牛屎餅」。莫非有人要請克勤食屎！？
用作有機肥料種植
克勤之後同我哋解釋，話區內都有唔少野牛過馬路時畀車撞倒事件，之前亦曾同政府開會，幫手處理野牛問題。西貢護牛天使同漁護署上星期喺西貢舉行聖誕賣物會，主要義賣以牛牛為主題嘅教育明信片、牛屎花同牛屎餅，護牛天使仲專登留起咗一塊全手製嘅心形有機牛屎餅送畀佢，又叮囑攞塊餅嚟做肥料嘅時候，唔好一次過用晒，否則就會太肥種唔到嘢。
佢收到呢塊「牛屎餅」都好開心，仲大讚義工們好有心思，仲留番半塊返立法會種嘢。收到禮物就當然開心啦，但克勤話最開心係今次義賣籌到嘅錢會用嚟製作反光帶，畀牛牛們戴住，咁駕駛人士夜晚都可以清楚睇到牛牛過緊馬路，就唔會撞到佢哋喇！