政情：環保區議員 流動議辦被膠帶圍封
西貢環保南區區議員張美雄開設議員辦事處真係多災多難！佢喺舊年當選區議員後，由於該區係私人屋苑，一直搵唔到合適嘅地方開設辦事處，就算想喺街邊放張枱做流動辦事處，亦因為係港鐵範圍，會被港鐵職員用「請勿內進」嘅膠帶圍住佢。佢原本打算搞貨櫃議辦，申請咗約一年，依家有可能搞唔成！
搞貨櫃辦事處遇阻滯
張美雄話地政處嘅諮詢期年中已經完結，期間冇收到任何反對，九月同地政處開會嘅時候，已經大致落實辦事處，但係地政處喺十一月話，收到幾個聲音反對，加上要再諮詢新入伙嘅屋苑，未知結果，所以佢只好即刻叫停申請電力，依家好擔心最終會搞唔成，覺得好無奈。
佢話如果最終搞唔成貨櫃議辦，只好暫時繼續同隔籬區嘅區議員合用辦事處，或者喺隔籬區搵地方租辦事處，亦會考慮向地政處或港鐵申請，租貨車泊喺該區做辦事處。