政情：雷動打茅波 選票論涉礙司法 圍插「廷」不了

立法會政制事務委員會尋日討論公共選舉中運用社交媒體、設立冷靜期，以及進行選舉調查作出規管，戴耀廷所搞嘅「雷動計劃」再度被鞭撻，而佢近期嘅言論都成為焦點。

工聯會議員陸頌雄指雷動計劃涉及大量選舉經費，去促使戴耀廷其心儀嘅候選人當選，會對其他候選人造成不公。另一議員李慧琼亦指雷動計劃動用大量資源，去促使某啲候選人當選，認為要維護選舉公平公正，政府需要作出調整，唔能夠於某段時間內公布選舉調查結果。

議員促廉署及選管會跟進

身兼律師嘅議員周浩鼎更狠批雷動計劃如同「打茅波機器」，認為喺投票日公開調查結果去影響選民，擺明走現行法例嘅灰色地帶，批評係「走法律罅」。佢話雷動計劃可能牽涉到未得候選人同意嘅選舉開支，認為廉政公署同選管會必須要嚴肅跟進。

議員張國鈞談及社交媒體時，就指戴耀廷利用社交媒體呼籲，民主派選委集體用選票，換取撤銷四名議員嘅司法覆核案件，質疑做法有否違反現有法例，觸犯妨礙司法公正、藐視法庭及選舉條例等。周浩鼎狠批戴耀廷作為法律學者，卻公然視法律如無物咁話。

干預律政司決定 泛民拒撐

其實戴耀廷嘅建議，就連泛民代表都有所保留，好似法律界議員郭榮鏗就指出做法唔恰當，認為係政治干預律政司決定。而中小型律師行協會創會會長陳曼琪亦就戴耀廷嘅言論，去信律政司司長袁國強，要求重申立場。再加埋立法會中又有多名議員狠批兼要求廉署同選管會跟進，睇嚟戴耀廷都一身蟻。