中環出更：蔣麗芸倡高官集體食蟹救市
內地大閘蟹樣本早前驗出二噁英超標，港府下令禁止江蘇兩個養殖場大閘蟹入口，全城陷蟹慌，蟹商生意大減。尋日立法會一個討論毒蟹風波嘅特別會議，議員蔣麗芸（Ann）埋怨，往年大閘蟹季節身邊朋友總會互相請食蟹宴，但二噁英事件後蟹宴幾近絕迹，好彩仲有黨友黃定光請過一餐。為咗挽回公眾對大閘蟹嘅信心，阿Ann要求問責官員倣效當年禽流感，衞生署署長陳馮富珍食雞一樣集體食大閘蟹，更笑說：「如果你哋肯，聽日有好多大閘蟹宴等住我食！」
大膽提要求 粗心噏錯名
阿Ann喺立法會食物安全及環境衞生事務委員會特別會議上話，好多蟹商只靠幾個月大閘蟹季節做生意，今次影響好大，質問官員點樣救救業界，並提出大膽要求：「你會唔會好似以前陳馮富英（珍）……陳馮富珍咁食雞……局長啊、副局長啊、署長啊，齊齊去食大閘蟹呢？」
但會議無局長、副局長同署長出席。食物安全專員譚麗芬就話，目前香港同內地最重要係調查大閘蟹二噁英超標事件，清楚出事原因，到日後問題處理好，食唔食大閘蟹係個人選擇。專員都算聰明，仲記得九七年爆發禽流感，陳馮富珍為安撫公眾而公開話「我日日都食雞，大家唔好驚」，因而被戲謔為「雞珍」至今，譚麗芬都就快退休，梗係唔想變「蟹芬」啦！
卓妮