中環出更：齋諗冇用 名人試出個未來
做人如果無夢想，同條鹹魚有咩分別？係人都識講，之但係夢想唔係話有就有，去邊搵先得㗎？百仁基金尋日就請到近期人氣爆燈嘅香港中文大學中國語言及文學系高級講師歐陽偉豪（Ben Sir）舉辦首場Talk Show，仲請嚟「牛下女車神」香港女子單車運動員李慧詩一齊做嘉賓，講夢想！
講到夢想，百仁基金主席李文俊話坐喺度諗係冇用，要親身去試，想當年讀書嗰陣佢同好多學生都一樣，唔知將來做乜嘢好，見啲同學仔個個都話想做醫生，於是一齊加入聖約翰救傷隊，見到人撼穿頭流血時自己都暈一暈先發現做醫生唔啱自己，又試過聽啲同學講做牙醫好，但自己整個石膏模時幾乎手都批埋，所以話唔試真係唔知乜嘢啱自己。後來佢做暑期工時賣吸塵機，兩個月嘅業績係全個辦事處入面最高，就開始明白自己原來適合做生意，用「手」嘅工作唔啱自己，用「口」先啱喎。
講番尋日個騷，Ben Sir笑言生「涯」規劃同懸「崖」及「捱」同音，聽落較負面，話夢想要「型」先夠吸引，笑稱中學時讀書唔叻但覺得企喺運動場上比賽時，女同學歡呼及氣氛等成個「package」好吸引，所以就諗不如做體育老師，輾轉到依家。呢日佢仲豁出去搵形象指導Eddie Tam，即場幫手圓佢一個「我要做model」嘅夢，處男行貓步，認真搞笑。
余偉傑達成志願繼承父業
同場仲有百仁基金副主席顏志永、陳稼晉、羅詠詩同余偉傑等。羅詠詩話細個想做時裝設計師，但試過縫衫同條褲聯埋咗一齊，惟有改變主意。顏志永笑言家族做工業，所以細個根本冇空間諗其他嘢，一心已諗住「做工業家！賺外匯！」非常專注。余偉傑就笑指本來唔記得咗童年夢想係乜嘢，但早兩年公司喺尖沙咀舉辦聖誕活動時於台上被小學同學發現，仲恭喜佢終於達成小學夢想，一問之下同學先告之原來佢小學時寫我的志願係「繼承父業」，依家都算係開始咗第一步。
卓妮