冇神經政府對民生事務反應遲鈍，好似處理假難民、大型基建一再延誤超支、覓地建屋等等，但對切身利益嘅就反應敏捷，好似建議問責官員要追多年通脹，各局長嘅現金薪酬調高百分之十二點四，各司長與副局長亦同步調整薪酬。
換言之，目前月薪約卅三萬嘅政務司司長一職，加薪後月薪超過卅七萬；局長月薪近卅萬元，加薪後達卅三萬多元；副局長現時月薪約十九萬至廿二萬，加薪後約廿一萬至廿五萬。各司、局長及副局長平均加薪二至四萬，佢哋一次加薪，坊間嘅一些高級職位坐火箭都追唔上。本來，人比人比死人，我哋一介草民恨唔到咁多，之不過，高官中太多職不稱位者，問責官員無能又不問責，表現幾差民望幾低殘卻從未有人被炒，而加薪卻一體同沾，市民點都唔順氣㗎啦！
講真，喺香港做高官真係令人欣羨到不得了，個個家肥屋潤卻只強調「服務」社會、市民，彷彿佢哋只有「貢獻」而冇得着，這是老朽最為不服的。美國總統日理萬機，月薪折合都不過得廿六萬港元，好似吳得掂局長咁每日一擘大眼就有成萬銀收入，若然佢有幸延續「每月讀三十本書」嘅華麗傳奇，咁就真係「書中自有黃金屋」喇！
清朝末年嘅郭嵩燾，官至兵部左侍郎，分在英法奉使三年，薪俸屋租外，不取一文公帑；郭嵩燾除日記外更是著作隨身，在吳得掂眼中，恐怕只淪為書呆子。至於一眾副局長甚至政治助理，其實都叻過英相文翠珊，佢嘅月薪折合僅約十一萬七千港元。所以話，有議員斥局長薪酬已經非常高，唔能夠接受再加薪，而有公務員工會就批評政府肥上瘦下，影響公務員士氣喎。之不過，政制及內地事務局局長譚志源就認為追回過去多年嘅通脹，屬「合理水平」。古人說：祿已厚而不知足者，患處之。香港之高官膽自大，加多啲追通脹大條道理，蟻民只能食北風狂呼吹脹！