政情：少年葉振南 日飲8公升可樂
汕頭商會前會長葉振南（Stephen）做酒代理生意，唔知係咪好飲得呢？Stephen笑稱，以前讀書時，飲汽水飲得仲誇張過酒，可以一口氣飲晒大玻璃樽可樂，而且全日當水飲，計番條數，每日飲成七至八公升可樂。好彩Stephen喺變成大肥仔之前戒咗，依家諗番起都覺得難以想像。
Stephen又話，依家除咗傳統啤酒外，佢仲代理手工啤酒，事關香港近一、兩年開始興起呢種文化，加上香港人對飲食講究，所以都幾受年輕人歡迎，但將來會唔會自己生產就要再觀察喇！
Stephen笑笑口話，最近佢又添咗名孫仔。記得上年囝囝擺酒結婚時，佢講笑咁以其代理嘅一個啤酒品牌諧音「make a son」過橋，叫一對新人快啲生小朋友，結果願望成真。加上佢兩個兄弟亦都添咗孫仔孫女，家族一口氣添咗三名新成員，四代同堂非常熱鬧。