政情：陳曼琪攻勢停不了 轟戴耀廷言論屬「買票」
中小型律師會協會創會會長陳曼琪（Maggie）一向動作多多，好似早前四名立法會議員遭政府入稟挑戰議員資格時，她就即時喺社交網站facebook貼上《喜氣洋洋》歌詞贈興。而向來有「反佔中律師」之稱嘅Maggie尋日再度出手，今次係衝住佔領中環發起人、港大法律系副教授戴耀廷而來。
認為觸犯選舉法例
戴耀廷上周接受傳媒訪問時話，非建制人士喺剛過去嘅選舉委員會選舉中取得逾三百席選委嘅佳績，認為非建制選委可以用提名票作籌碼，以換取下屆特首撤銷司法覆核四名議員，更講明：「如果繼續DQ（取消資格），我咪唔畀票你囉！」不過，作為泛民之一嘅法律界議員郭榮鏗已表明反對呢種做法，認為係以政治干預律政司決定。
Maggie就形容戴耀廷嘅建議係公開「買票」，認為有機會觸犯《選舉（舞弊及非法行為）條例》，嚴重影響香港法治及廉潔。她更指出，律政司為司法覆核案件申請人之一，又係負責檢控觸犯選舉條例的部門，所以律政司司長袁國強有需要就戴耀廷嘅建議重申立場，並指事關重大，要求袁國強喺本月二十八日前回覆。