政情：民協執雞 老馮要選
青年新政游蕙禎同梁頌恆因為宣誓辱華風波，被法庭裁定取消立法會議員資格，兩人所屬嘅九龍西同新界東議席勢必舉行補選，據聞九龍西方面，建制派早已決定由民建聯油尖旺區議會主席葉傲冬領軍出戰，但泛民主派就未決定人選。據了解，早前喺立法會選舉全軍盡墨的民協有意派人力爭一席，但黨內對於派老將馮檢基、中生代莫嘉嫻或者新丁何啟明仍存在分歧，由於三人各有支持者，似乎爭出選在所難免。
民協喺早前嘅立法會選舉派出馮檢基、譚國僑分別出戰新界西和九龍西直選，又派新丁何啟明出戰超級區議會議席，可惜無功而還，此役重創黨內士氣，亦令唔少黨員出現離心，時任主席莫嘉嫻更加因此而辭去黨主席一職，退居幕後擔任民協社企再培訓中心總監助理。游蕙禎被取消議員資格後，有傳民協黨內一致認同要派人出戰補選，至少要奪回一個議席，重振聲威，但黨內就對人選仲有重大分歧。
泛民願為莫嘉嫻讓路
知情人士透露，雖然莫嘉嫻已經退居幕後，但仍深得黨內外支持，唔少黨友都勸佢出選，亦有泛民政黨明言，若由莫嘉嫻出選唔介意讓路畀民協，而莫嘉嫻表示會考慮出選，但最終要交由黨內決定。至於另外兩個人選，分別為喺區議會及立法會選舉兩戰兩敗嘅老將馮檢基，以及新人何啟明。有泛民意見認為，喺新舊交替嘅政壇文化之下，馮檢基唔應該「點極都唔化」，要知所進退，要交棒畀新人；亦有意見覺得何啟明暫時未夠班上立法會，要多加磨練。
拒摒棄老人政治參戰
據知，馮檢基與何啟明喺黨內支持度只屬「五五波」，黨內仍然未落最後定論。馮檢基回覆查詢時話，民協正準備會員大會改選，補選一事暫時未有討論。其實馮檢基之前兩戰兩敗，都反映社會已經摒棄老人政治，但佢扶唔到新人上位不特止，反而一而再計劃參選，似乎講不過去，如今應該考慮退位讓賢，否則一個政黨點會睇到將來呢？