中環出更：馬斐森阿Q：港大畀人鬧好過無人理
今年一月香港大學校務委員會風波演變成衝擊，令港大經歷咗充滿風風雨雨嘅一年。轉眼又到年尾，港大校長馬斐森日前喺港大校董會會議上，分享港大過去一年表現時就話，唔知點解港大成日吸引不成比例嘅批評，例如明明全港大學世界排名都下跌，但偏偏港大下跌最吸引大家注意；就算一個示威遊行有齊八大院校學生參加，大眾都會話係港大策劃，而最令佢心痛嘅係，部分批評只係基於謠傳或者係選擇性報道喎。
話排名回穩 自我感覺良好
馬斐森呻完一輪後就改以阿Q精神自我安慰，話會當呢啲批評係大眾對港大嘅恭維，因為大家關心港大，認為港大對香港、甚至全世界有影響，先有人留意，好過無人理喎。佢之後仲分析泰晤士高等教育同埋QS世界大學排名，話雖然港大排名喺二○一○至一五年有下跌趨勢，但其實今年排名已經回穩，並非持續下跌，真係自我感覺良好喇。
查實馬斐森與其去諗點解大家針對港大，不如將心神用喺改善港大教學同研究質素好過啦，相信對提升港大排名會有更加實際嘅幫助。
卓妮