中環出更：社企人才難尋 蔡德昇頭痕
唔少名人有時間都會做吓義工或者搞吓社企，令近年香港嘅社企數目愈嚟愈多。香港青年聯會屬下嘅賢慧社日前舉辦一場午宴講座，探討香港社企發展，唔少有營運社企經驗嘅名人都有出席分享經驗，其中和富社企創辦人李宗德嘅女婿、青聯副主席蔡德昇（Stanley）就大嘆社企人才難求喇！
Stanley話，營運社企最頭痛就係請有人脈網絡嘅管理人才，因為呢類人才往往要高薪先至請得起，除非佢哋好有心服務社會，否則就好難重金招攬，而呢個正正係缺乏資源嘅社企嘅弱處，難怪佢大嘆人才可遇不可求囉！
福利與商業化 兩者易失衡
同場嘅青聯參事楊鼎立及咭片皇創辦人鄭重科就覺得，唔少社企都有發展失衡嘅通病，楊鼎立話，香港啲社企一係側重提供福利，一係過於商業化，令到發展受到局限，所以佢參與咗一項為社企提供專業意見嘅計劃，幫助社企做好定位。
鄭重科亦有相似嘅看法，因為大部分營運社企嘅人缺乏商業知識，令社企營運出現問題，只能依靠政府資助維生，所以佢都有向社企提供導師，傳授管理知識，希望可以提升社企嘅成功率咁話。
民政事務局副局長許曉暉、青聯主席吳傑莊、賢慧社召集人林玉茵同總監周沁都有到場。許曉暉話，香港有超過五百間社企正在營運，共創造逾八千個就業機會，當中超過八成受聘人士來自弱勢社群，有啲社企仲喺半年內達到收支平衡添！聽落香港社企表現都唔算太差啫！
卓妮