政情：踩枱拉高褲搲腳 石禮謙醜態「夠真」
立法會議員開會時嘅一舉一動，都輕易被鏡頭捕捉，之前就有議員被拍下食蕉相片而引起笑話。至於要數最經典，就一定係前立法會議員何俊仁被拍到喺開會期間，觀看性感女郎艷照，事發之後就一直被嘲諷為「AV仁」。不過，尋日又有議員被拍下醜態，今次主角係資深議員石禮謙（大舊石），當眾拉高褲腳抓痕！
話傾傾吓偈有嘢咬
話說尋日內務委員會開會前夕，大舊石坐喺會議室座位時，就將左腳踩上枱邊，然後拉高埋褲腳，抓咗幾吓小腿，成個動作非常自然，唔講都唔知佢喺會議室入面囉。其實依家天氣乾燥，皮膚的確容易痕癢，但眾目睽睽下戙高隻腳抓痕就好似無乜儀態喇。
大舊石回應事件時就相當氣定神閒，佢解釋當時仍未開會，同緊黨友張華峯傾偈，突然感覺左腳小腿「有嘢咬」先忍唔住抓幾吓啫。佢話，即使開會期間，感到痕癢都會照抓痕，仲話最緊要份人夠真，所以唔怕人講，果然係真性情喇。其實抓痕都係人之常情啫，只係佢踩住張枱抓痕抓得太張揚，睇嚟下次要注意吓喇。