政情：佳叔知衰 特首戰封嘴

一時一樣 噏得就噏

佳叔經常對本港時政指指點點，噏得就噏，曾經話過CY勝算高嘅佢尋日就改口，話CY宣布唔競逐連任並非意料之外嘅事，又話如果CY強行尋求連任，或會令香港出現更大反彈，繼續分裂，令鬥爭更加激烈。一時一樣，真係乜都佢講晒。不過，佳叔對於其他議題就拒絕評論喇，例如曾俊華（鬍鬚曾）辭去財政司司長一職，中央至今未批一事，佢就話因為依家有太多唔同訊息，所以唔敢有任何解讀。

對於被問到邊個最有機會成為下屆特首？佳叔今次當然冇再提CY啦，淨係話唔敢預測，認為各人都有其優劣，至於有何具體優劣，佢就拒絕評論喇。佳叔即係講咗等於無講，幾乎未講埋下任特首一定年滿四十歲，唔係男就係女，唔知佳叔係咪因為錯撐CY，自己知衰，所以依家乜都唔敢講呢？

亂估出事 早有前科

其實佳叔亂咁噏當秘笈已經早有前科。喺二○○三年，香港正值多事之秋，包括政府就《基本法》第二十三條立法及沙士疫情等，時任中央政策組首席顧問嘅佳叔被問到，七．一遊行將會有幾多市民上街時，佢就估計有三萬人，仲話唔太憂慮遊行會打擊政府管治權威，點知當年七．一就有五十萬人上街，最後前特首董建華仲要「腳痛下台」，提早離任。睇嚟佳叔咁多年都冇吸取教訓，莫非博冇乜人留意佢講嘢？