中環出更：議員齊探討 田二少有冇「撤」？
立法會交通事務委員會尋日討論的士加價事宜，但議員田北辰（田二少）竟然喺會上連番話自己「冇撤到」，而其他議員事後又討論得興高采烈，到底搞咩呢？其實田二少所講嘅係撤回個「撤」字，話說會議上，田二少就自己提出嘅原議案作出字眼上嘅補充，惹來非建制議員質疑佢逾時作新修訂，而議員陳淑莊就話，要了解佢係咪撤回原有議案先。
為議案作補充引發笑料
雙方就此爭持不下，搞到田二少都話唔好意思帶來咁多不便，但就強調只為原議案作補充，重申「我冇撤到喎」，更強調「我冇撤呀，我一直冇撤！」搞到會議室傳出陣陣笑聲，大家乘機起哄，九成係「撤」同「切」同音，即「自宮」，大家諗起衰嘢就笑出嚟。
議員林健鋒事後就話，當時第一個出聲幫口指田二少「冇撤到」，之後會議就變成雙方爭拗「有冇撤」，而委員會主席陳恒鑌重提事件都話搞笑，稱當時裁定田二少「冇撤」，路過嘅田二少都開玩笑話：「問人有冇撤都有嘅」，睇嚟大家對開會情況念念不忘喎。
卓妮