中環出更：九旬健壯矍鑠「亮」出不老秘訣
香港善德基金會早前舉行就職晚宴，數百名城中名人去捧場，「變形金剛之父」、永和實業主席林亮及太太戚小彬（Shelly）都有到場。林亮今年已九十三歲，身體仍然好健壯，唔知有咩秘訣？佢笑稱一直奉行四金句，即「食得清、行得穩、看得開、睡得狠」。Shelly就笑笑口話幫林亮寫緊自傳，記錄佢嘅傳奇一生，希望趕及明年書展推出。
Shelly話，原本打算用三年時間出書，作為林亮九十歲生日禮物，點知後來經典嘅黃色小鴨重出江湖，令Shelly忙到飛起，結果本自傳寫足六年。Shelly細個曾經喺內地當兵，後來讀眼科、做軍醫，但佢最鍾意嘅都係文字工作，曾經做過記者添，難怪佢可以為林亮自傳操刀喇！
靚太戴眼罩獻唱掀高潮
講番就職晚宴嘅精彩節目，善德主席董吳玲玲、副主席蕭何元鳳及副主席藍國慶太太王雲仙齊齊戴上神秘眼罩獻唱，模仿內地好受歡迎嘅「蒙面歌王」節目，為晚宴掀起一陣高潮。靚女歌唱家周旋都有到場，事關三位靚太跟佢學唱歌。周旋笑稱三人係挑戰「不可能」，因為練歌時間唔多，佢仲緊張過自己登台添！
善德永遠名譽會長、卓悅控股副主席葉鍾佩雲當晚着得靚靚，原來佢件意大利靚衫係網購返嚟。葉太笑稱，依家十一月十一日已變成網購日，全世界商家都趁呢日大傾銷，卓悅亦有做網上直播，佢就一邊監察公司直播情況，一邊喺網上購物，結果就買咗呢件心頭好喇！
卓妮