之前都講過，自由黨青年團前主席李梓敬（Dominic）嘅細仔喺上個月出世，但因為早產，要喺廣華醫院嘅新生嬰兒深切治療部留醫，到咗上個周末終於有好消息！細仔可以出院，返屋企同爸爸、媽媽、哥哥一家團聚。
終於一家團聚，Dominic當然喜不自勝，即刻影番張全家福擺上facebook，同大家分享自己嘅喜悅啦！Dominic仲話，自己原本擔心大仔會呷醋，好彩人仔細細嘅大仔已經好有大哥風範，好錫細佬。Dominic又大爆自己成日同大仔講蜘蛛俠嘅名句「With great power comes great responsibility（能力愈大責任愈大）」，可能大仔聽得多，入晒腦，知道自己要錫晒細佬喇！
