政情：吳文華搞社企 卿姐去打卡
唔少政界人士放低咗政黨工作之後，都會花多啲時間做吓義工或幫手做吓社企，志在服務香港。立法會前秘書長吳文華（Pauline）離開咗立法會之後，喺今年一月就自資成立社企「柏安康」建立長者資訊網絡平台，推動「綠齡」人士積極人生。
卿姐與成員合照放上fb
原來Pauline喺年初就已經喺尖沙咀搵咗一個方便殘疾人士同長者返工嘅辦公室，再透過勞工處聘請殘疾人士，社企話咁快已投入服務。佢尋日就邀請卸任民主黨主席冇耐嘅劉慧卿（卿姐）上去參觀，順道敍一敍舊。
卿姐就話，其實退下火線之後成日都會同Pauline見面，尋日好開心可以同喺社企服務嘅殘疾人士見面，自己亦都好支持Pauline嘅社企可以幫到殘疾人士。大家咁開心，卿姐仲專登將同社企各成員合照放上facebook添！
卿姐曾經講過離開議會之後，會搵個角色搞好香港，唔知依家有頭緒未呢？抑或參觀完Pauline搞嘅社企，會心郁都想開番間社企呢？