政情：葉建源七傷拳 自己打倒自己
新一屆立法會開始咗兩個月，非建制派直至尋日先至有機會提出議員議案，分別係立法會教育界議員葉建源提出、針對人稱「吳得掂」嘅教育局局長吳克儉，同埋由本土派議員劉小麗提出嘅墟市政策議案，但葉建源嘅議案因為少議員發言，辯論咗大約一個半小時就草草收場，仲因為原動議畀建制派修改，而要投反對票，自己否決自己嘅議案。至於劉小麗就因為尋日朝早要就議員宣誓司法覆核案上庭，而缺席立法會會議，未能提出其議案。非建制派真係出師不利！
張國鈞批葉對人不對事
葉建源尋日喺立法會大會動議辯論「下任教育局局長須具備的條件 」，佢發言時炮轟吳得掂，話特首梁振英將香港教育交畀人稱「吳得掂」嘅吳克儉，令原本基礎優厚嘅香港教育喺過去四年停滯不前，吳得掂「周圍觀光」、無心教育，其拙劣表現對香港教育傷害相當深。不過，民建聯立法會議員張國鈞就提出修正案，將葉建源原動議中對吳得掂嘅批評字句全部刪除，仲喺會上批評葉建源動議係對人不對事，對吳得掂「胡亂開槍」，對香港教育冇好處。
唔知係咪大家對吳得掂已不存寄望，所以發言嘅議員寥寥無幾，加埋提出修正案嘅議員，只有八名議員發言。張國鈞嘅修正案亦喺建制派佔多數情況下獲得通過，由於原議案經修正後已改到面目全非，搞到葉建源要投反對票，反對番自己的議案。換言之，議案被騎劫，葉建源打倒自己喇！
劉小麗無影 墟市冇得傾
呢個動議辯論之後，原本到由劉小麗提出「訂立全港性的長遠墟市政策 」議案，但由於立法會秘書處獲劉小麗通知，因為佢要出庭，返唔到立法會，故無人提出議案，立法會亦都提早休會。
發展墟市一直係劉小麗嘅主打議題，萬一劉小麗喺議員資格司法覆核案中敗訴，被取消議員資格，呢個長遠發展墟市嘅議案都可以話係佢喺立法會嘅一個印記，但點知個議案「出師未捷身先死」，今次真係分分鐘連紀錄都冇埋喇！