政情：陳恒鑌戒牛 圓母生日願望
乾炒牛河相信唔少人都食過，但民建聯立法會議員陳恒鑌（Ben）半年前開始對乾炒牛河說不，事關佢媽媽本身係虔誠佛教徒，而今年生日願望就係希望佢唔再開始食牛肉，孝順嘅Ben亦應承母親，令母親嘅生日願望成真！
Ben嘅母親因宗教關係，多年來都唔食牛肉，又循循善誘Ben戒牛，但據知唔少潮州菜都有用牛做食材，因此身為潮州人嘅Ben一直都忍唔到口，直到今年母親大壽，開到口生日願望係Ben唔再食牛肉，Ben應承咗並坐言起行，至今已經戒咗半年。Ben話，戒牛無想像中咁辛苦，因為佢仍然會食豬同羊等，但佢坦言唔似得以前，依家見到好多家鄉菜都會忍一忍口。
出任母校科大校董會成員
另外，十多年前於科技大學畢業嘅Ben最近「愛回家」，本月初獲委任為科大校董會成員，任期直至二○一九年七月底。Ben憶述，就讀科大時最難忘係連續幾晚漏夜趕畢業習作，期間又想食消夜，但由於科大位置偏僻，附近根本無乜食肆，結果每晚都捱肚餓對抗睡魔，唔知Ben今次重返母校，會唔會以議員身份爭取更多食肆落戶科大一帶呢？