政情：白鴿黨秘書長 「登輝」決戰
民主黨（白鴿黨）早前召開黨員大會選出新任主席同埋中委會委員，佢哋今日就會召開首次中委會，並會選出秘書長，接替已改任副主席嘅李永成。據了解，曾任秘書長嘅張賢登與四度輸咗區議會選舉嘅莊榮輝爭奪秘書長一職，有意見指兩人各有千秋，估計結果係「五五波」，至於司庫就會由袁海文連任。
張賢登曾多次出任白鴿黨秘書長，但五年前因為患癌而辭任，之後轉任中常委，而喺舊年，佢同徒弟鄺俊宇因為不滿黨內大佬文化，換屆選舉「換湯不換藥」而退出中委會，直至近日胡志偉當選主席，張賢登先出山競逐中委會委員。
至於莊榮輝就係白鴿黨嘅「長輸將軍」，區議會選舉四戰四敗，但勝在屢敗屢戰，而且黨內人緣都唔差，若果今次可以當選秘書長，就係佢首場勝仗。今次張賢登捲土重來，同屢敗屢戰嘅莊榮輝爭做秘書長都算係世紀之戰，至於結果今晚就會揭盅。