政情：羅冠聰前途 暗黑唔使等2047
本土自決派成日都聲稱香港有前途問題，提出自決主張，甚至藉詞搞自決公投同搞港獨。香港眾志立法會議員羅冠聰尋日就喺立法會提出口頭質詢，要求當局回應有冇就二○四七年後香港前途問題進行研究，甚至搞公投。不過唔止本土自決派同非建制派冇幫拖質問當局，羅冠聰仲畀建制派鬧爆，話佢扭曲《基本法》、藉二○四七年喺度「做文章」，刻意製造社會恐慌。話時話，羅冠聰等幾位自決派議員正面對司法覆核，隨時議員都冇得做，佢哋與其喺度大談香港前途，不如顧掂自己前途先啦！
羅冠聰尋日話《基本法》列明香港唔實行社會主義制度同政策，保持原有資本主義制度同生活方式，五十年不變，即係直至二○四七年都唔變，但之後點樣就眾說紛紜，問當局有冇就此進行研究。
被斥借自決提港獨
政制及內地事務局副局長陳岳鵬表明國家對港嘅方針政策已寫入《基本法》，《基本法》係唔會喺二○四七年後失效，而「一國兩制」一直運作良好，毋須改變，而香港係唔會，亦唔可以有任何形式嘅公投。不過羅冠聰似乎唔多滿意，仲話政府唔可以話二○四七年大限唔存在就草草帶過。
建制派議員梁美芬隨即批評羅冠聰利用二○四七年「做文章」，認為香港唔存在主權問題，亦唔存在公投。佢又話好多人利用「自決」之名提港獨議題，誤導年輕人，要求當局喺中學加強教育同宣傳《基本法》。
扭曲《基本法》捱轟
另一議員葛珮帆亦都喺會上批評，社會上有人利用「二○四七年大限」呢個說法喺社會製造恐慌，要求當局向公眾發放權威訊息以作澄清。而議員李慧琼就話如果大家清楚《基本法》，就唔會有人扭曲《基本法》同製造恐慌，詢問當局有冇統計有幾多組織刻意製造呢啲恐慌。唔通佢想當局「清算圍剿」呢啲團體？
羅冠聰被建制派圍攻，但成條口頭質詢長達廿分鐘，竟然都冇非建制派幫拖。羅冠聰與其孤軍作戰、對所謂香港大限問題誇誇其談，不如顧掂自己先好過喇。