中環出更：生意艱難情不減 董觀明及時行善
香港鐘表業總會及香港表廠商會一班成員早前難得一齊歡聚，事關「國產錶王」時計寶主席董觀明（Michael）捐出五百萬元作為業界人才培訓之用，兩大商會各分一半，咁有意義，梗要齊心舉行晚宴致謝。依家業界生意清淡，搵錢艱難，但Michael就笑稱有錢無用，最緊要身體好，所以大家應及時行善，千祈唔好「人在天堂，錢在銀行」喎。
Michael做錶帶起家，後來喺內地自創「天王錶」品牌。鐘錶界老行尊孫秉樞讚揚Michael係商界奇才，大情大性嘅佢經常爆金句，飲咗酒之後金句仲多，所以大家要趁佢飲多兩杯後偷吓師。孫秉樞又讚Michael好有愛心，最近去緬甸落後地區買地起教堂、扶助孤兒。同場嘅表廠商會副會長林偉雄就話，Michael對動物一樣有愛心，有次佢同Michael出海去小島餵流浪狗添！
高偉國瞓身搞健康產品
最近瞓身投資健康產品嘅表廠商會副會長高偉國，都好認同健康最重要，仲話最近鐘錶銷情一般，但係健康產品就唔受影響。難怪佢愈做愈起勁，正構思將牛樟芝混入唔同嘅堅果，做成好味又健康嘅零食。
當晚到場嘅仲有剛卸任鐘表業總會主席嘅黃麗嫦、三寶珠寶首席執行官李永安、六福集團鐘表部高層何德明等人，董觀明嘅大仔董偉傑同細仔董偉軒亦喺度。黃麗嫦話業界一向缺人，希望今次捐款有助業界培訓專業人才。
卓妮