政情：人仔急跌 余鵬春憂港零售
人民幣持續貶值，照計做內地貨品入口生意嘅商家應該笑呵呵，不過裕華國貨董事總經理余鵬春就笑唔出。佢話依家公司有八、九成貨品由內地進口，但係佢唔希望人仔跌得太快，因為咁樣反而有損失，例如之前入貨嘅匯水相對較高，存貨等如買貴咗。如果匯價繼續急跌，又等於鼓勵港人北上消費。聽佢咁講，人仔跌真係幾頭痕。
唔想受人仔匯率影響太大，惟有分散風險。所以余鵬春話佢哋喺尖沙咀柏麗大道有間舖專賣美國護膚品，希望嘗試令產品多元化，分散投資咁話。此外，原來裕華都有賣大閘蟹，仲賣咗幾十年，佢話二、三十年前，只有國貨公司同專賣店有得賣大閘蟹添！
毒蟹風波牽連廣
不過今個蟹季爆出毒蟹風波，唔少商戶都受影響，余鵬春話佢哋出售嘅大閘蟹係逐批空運來港，早就賣晒存貨。受到事件影響，其實內地亦已「落咗閘」唔畀大閘蟹出口，佢哋亦入唔到貨喎！