政情：王國強膺理大博士彌補遺憾
廣東社團總會榮譽主席王國強（KK）兩年前重返校園做超齡學生，修讀理工大學商業管理博士學位，早前佢終於披上博士袍，喺理大校長唐偉章手中取得證書，正式成為理大嘅校友。KK笑稱，年紀咁大都仲讀番書，係因為要彌補當年被理大踢出校嘅遺憾。
曾因「肥佬」被踢出校
呢個情意結要追溯至一九六八年。KK話，當時香港只得港大一間大學，佢想繼續修讀工科，一係出去外國讀，一係讀理大前身工業專門學院（工專）。KK雖然考上工專，但因為熱力學呢一科成績只得五十九點四分，差零點六分先至合格，結果被退學。KK諗起都好心噏，不過當時全班三十六個同學之中，廿六個都同佢一樣命運。
後來KK輾轉到外國升學，學業同事業都有所成，不過對當年呢段經歷始終有遺憾。如今佢唔止如願以償，仲成為理大近廿年來年紀最大、同埋以最短時間攞到學位嘅博士添！