政情：政府部門散渙 智慧城市進度緩進度緩

智慧城市聯盟成立一周年，尋日搞咗個交流活動，回顧過去工作，當中包括同海外國家同埋創投公司簽訂備忘錄，希望能夠加快喺香港落實智慧城市。講起同政府部門打交道，EQ話聯盟用咗唔少時間游說政府多啲應用資訊科技，同埋發展智慧城市，其中佢讚揚創科局成立後，令到社會更關注創新科技，成個社會氛圍都有改善，亦吸引唔少投資者。

錯失整合交通資訊機會

至於環保局局長黃錦星同副局長陸恭蕙態度亦好積極，發展局推動「起動九龍東」嘅進展亦唔錯。唯獨約見運房局時，感覺到對方唔太願意傾。

EQ批評話，運房局絕對有空間去應用資訊科技以改善市民生活質素。例如，運房局批出交通工具專營權時，應該要求對方交出數據，用以分享製作包含各種交通工具路線、車資等資料嘅應用程式，咁市民就毋須只依賴個別公司提供相關資料，仲要安裝多個手機應用程式添！EQ又話，因為運房局過去冇注意，搞到現時難以要求擁有專營權嘅公司去配合，因為對方會以專營無要求為由而唔做。唔知運房局局長張炳良聽到EQ咁鬧，會唔會醒定啲做嘢呢？

另外，EQ直指依家各部門嘅數據同資料未能互聯互通，顯示政府冇善用科技。難怪政府逢親有新政策時，經常要額外花錢聘請顧問去整合唔同部門資料，再收集持份者意見，若然政府數據可以互聯互通就慳番唔少喇！

政府一盤散沙 不進則退

EQ愈講愈勞氣，話香港嘅八達通、智能身份證、機場行李託運等技術曾經領先其他地方，但之後就一直原地踏步，令其他地區後來居上。講到尾，香港想急起直追，都要好似一盤散沙咁嘅政府部門配合先掂，否則想做智慧城市都係遙遙無期囉！