中環出更：漢奸黎家宅無寧
特首梁振英尋日下午宣布因為家庭理由放棄連任，壹傳媒黎智英（漢奸黎）夜晚隨即喺佢嘅何文田寓所搞神秘聚會，出席者包括「搞事四人幫」成員、有「民主阿婆」之稱嘅前政務司司長陳方安生、其左右手Mark Simon同多名外籍人士。一向反梁嘅漢奸黎唔知係咪為咗梁振英唔連任而開派對慶祝呢？不過尋日再有一班示威者無視漢奸黎向法庭申請嘅禁制令，喺漢奸黎寓所外高舉標語抗議，睇嚟漢奸黎都好難家宅安寧喇！
漢奸黎早前向法庭申請禁制令，禁止任何人士喺黎宅外示威，以及騷擾、阻礙佢本人、屋企人同訪客，尋日再擴大禁制令範圍。不過尋日下午三時許，仍然有十六名聲稱自發前來嘅人士去到漢奸黎寓所外示威。
示威者控訴「滾出香港」
佢哋高舉印有「香港法治已死」、「禍港毒媒橫行」等字樣嘅紙牌，又設置投影機同播放音樂。示威人士仲一齊向漢奸黎寓所舉起左手，之後又將手指向地下，佢哋其後解釋，手勢意思係要漢奸黎滾出香港。示威者逗留咗一小時就和平散去。
Mark Simon亦有現身
到夜晚六時許，一班訪客陸續抵達，首先係Mark Simon，冇幾耐漢奸黎嘅司機就接載咗一男一女，包括一名外籍男子到場。而民主阿婆同妹妹方寧生亦都同一名男子一齊到達黎宅。直到七時左右，再有一名外籍黑人女子及一名男子前後腳到達。眾人喺黎宅逗留至九時半先至各自離開，漢奸黎更送客送到門口。
卓妮