曾經是「街頭戰士」的本土民主前線梁天琦，原來一股熱血都是假的，原先的甚麼「光復香港、時代革命」經不起微風一吹，都化作點點愁緒，如夢似幻。早前不少人納悶，梁天琦忽然如人間蒸發，兩隻小學雞被褫奪議席，一眾非建制派都有假惺惺「護航」，何以佢有份為兩人鳴鑼助選，此時竟然粒聲唔出，選擇沉默是金？
最近，呢位被老朽形容為「港獨無望，求財有方」的「太成功嘅失敗典型」，接受訪問時自爆唔想出街，終日與貓為伴。又話感覺自己好廢，好多時候都係得個噏字，而無堅實嘅理論基礎喺後面，所以選擇去讀書。阿哥，一個要「光復香港」嘅革命青年講呢啲，如果唔開估，相信猜一萬次都估唔到係「勇武」梁天琦講嘅「肺腑之言」吧？
毛澤東十六歲離開家鄉，留下一首七絕《改西鄉隆盛詩贈父親》，詩曰：「孩兒立志出鄉關，學不成名誓不還。埋骨何須桑梓地，人生無處不青山。」或許，受小小挫折就廢到無倫、會疑神疑鬼嘅梁天琦，根本不配與毛作比較，咁不如同研究「扑嘢文化」大名遠揚嘅游蕙禎比較吧。有人影到游一身白衣去買酒，佢司法覆核上訴輸到四腳朝天，仲要負擔幾百萬元訟費，都唔會愁困屋企抱住隻鬆弛熊公仔，或者無聊到睇希特拉嘅《我的奮鬥》；即使其議員辦公室人去室空，據云曾留有字條寫上：留得青山在，哪怕無柴燒，兵不厭詐，唔好畀人估到你會點做，留待日後同班老鬼對抗！
游蕙禎係曹操信徒，皆因佢深明「對酒當歌，人生幾何……何以解憂，唯有杜康」，甚麼訟費幾百萬元，先乾了這支好酒再說。而堂堂男子漢嘅梁天琦竟然惜身到自認懦弱，故沒有在人大釋法事件上發聲，亦無意參與立法會補選，也不會再幫人站台。香港睇嚟陰盛陽衰，老朽押一注買下屆特首女士跑出！