探射燈：不適無立即求醫 或難獲賠
食客吸入炭爐的氣體導致身體不適，能否獲得保險賠償呢？國際專業保險諮詢協會會長羅少雄指，吸入不明氣體導致身體不適的情況屬於意外事件，如食客有購買醫療或意外保險，所有因事件而導致的損失，一般都可獲賠償。
宜報警備案 留醫療單據
「如果冇買到保險都可以民事索償，最緊要所有嘢都有單有據。」羅提醒，要成功索償，當事人必須得到合資格醫生證明，並備存因事件所產生的醫療費用單據，「最好備埋案，警方有紀錄，咁就冇得拗啦。」
另外，羅叮囑當事人感到不適後應該立即求醫，否則可能因此而不受保，「千祈唔好隔幾日先睇醫生，就算醫生證明到你唔舒服，都證明唔到你唔舒服係因為前幾日吸入一氧化碳，咁就可能會保唔到。」