政情：公民講場：臨換屆先出手 蘇錦樑遺爛攤

為打擊內地零團費及劏客旅行社，業界早年要求當局成立旅遊業監管局（旅監局），代替旅遊業議會負責行業規管角色，政府喺○一年決定成立旅監局，但一直只聞樓梯響，負責嘅商務及經濟局局長蘇錦樑（Greg）以草案牽涉嘅問題好複雜，一味拖，足足拖咗五年，相關嘅草案尋日先出台。老實講，Greg蘇拖到依家剩番半年任期，先將草案提交畀立法會審議，除咗業界之間嘅分歧之外，以依家立法會嘅生態，泛民分分鐘又會拉布，呢條草案真係凍過水，旅監局成立可謂遙遙無期呀！Greg蘇係咪諗住自己下屆冇得撈就可以甩身，留低個爛攤子畀人？