立法會負責調查特首梁振英，收受澳洲UGL公司五千萬港元事件嘅專委會籌備小組委員會，上周五投票選主席，喺投票增設副主席時，建制派就唔夠人甩轆，搞到最終無法增設副主席以作制衡。當日缺席會議嘅梁美芬尋日就揸住柺杖現身立法會，原來佢上周五朝早左腳要做微創手術，佢話原本打算中午完成手術後返立法會開會投票，但就畀醫生阻止，而手術後醫生亦吩咐佢要用拐杖一個星期。其實梁美芬隻腳今年六月已經整親，但一直忙於立法會選舉，所以搞到依家先做手術。要忍痛半年，真係慘慘豬喇！
