政情：富戶長毛霸公屋新政策都無符
房委會資助房屋小組委員會聽日開會，討論收緊公屋富戶政策，消息指將建議如富戶入息超出上限四倍即須被踢走，霸住公屋多年嘅社民連立法會議員梁國雄（長毛），喺新政策下理應被「叮走」，但佢今年啱啱滿六十歲可獲豁免，房委會只能眼白白繼續任由佢霸佔公屋資源。
長毛因現有富戶「雙軌制」下，資產不逾上限而霸住公屋多年。現行公屋一人入息限額為一萬零九百七十元，如新政策落實，喺「單軌制」下，只要入息超出四萬三千八百八十元就會立刻被「叮走」，長毛現時月入高達九萬五千一百八十元，本應要「走人」。
剛滿60歲豁免申報入息
之不過，長毛喺今年三月滿六十歲，按現行政策，年滿六十歲長者獲豁免申報資產及入息，換言之長毛可以「過到骨」，唔受新政策影響續霸公屋。長毛現居於九龍灣啟業邨一個單位，面積二十三點三平方米，可供編配兩至三人居住。
政府三年上樓嘅目標達唔到，輪候公屋條隊愈嚟愈長，立法會房屋事務委員會主席麥美娟坦言，如果有人有能力自置居所或租屋，尤其係擔任議員，應該自律同問下良心，攞番間公屋出嚟畀有需要人士咁話。