政情：葉劉未話選特首已被拆祠堂

葉劉尋日同另一行會成員林健鋒提起早前建制派議員力推嘅內地「吃喝玩樂」團，提起返鄉下，葉劉自爆喺內地嘅劉氏祠堂因為高鐵而被清拆，鄉親仲叫佢幫手請願添，而林健鋒就拍心口話，同葉劉一齊返去處理。

自稱「疑似候選人」「無紅燈」

傳聞葉劉會喺本月十五日宣布參選特首，佢就話到時會通知大家。咁請咗邊啲貴賓？佢話自己地位喺「候選人當中係最低」，所以請唔到乜嘢人，雖然之後佢改稱自己係「疑似候選人」，仲強調自己「無紅燈」。比起之前話有人叫佢辭行會選特首係「陷她於不義」，佢今次嘅口風明顯有唔同，似乎佢參選特首係勢在必行喎。