政情：漢奸黎申禁令阻聲討 五十步笑百步
正所謂「剃人頭者人亦剃其頭」，呢句恰恰係最佳形容壹傳媒黎智英（漢奸黎）依家面對嘅情況，事關漢奸黎位於何文田嘅寓所外，最近半年遇上逾百次嘅示威，示威者清一色鬧爆漢奸黎係亂港嘅千古罪人。眾所周知，泛民中人將示威、言論自由嘅重要性掛在嘴邊，殊不知漢奸黎近日突然透過律師向高等法院申請禁制令，禁止任何人士喺佢寓所外示威及騷亂或阻礙佢本人。漢奸黎喺兩年前嘅違法佔領行動，日日喺金鐘「皇座」據點阻住人就得，依家聲討佢嘅行動停不了，就嫌人阻住佢要出動禁制令，真係五十步笑一百步嘞！
漢奸黎亂港事迹罄竹難書，市民對此亦心中有氣，自今年六月十日開始，持續約半年時間，好多市民自發到佢嘅寓所外示威，狠批佢係賣國賣港嘅千古罪人，而且被質疑係前年違法佔領行動「幕後黑手」，唔知係咪畀人篤中咗死穴，佢突然透過律師向高院申請禁制令，禁止任何人士喺佢寓所外示威及騷亂或阻礙佢本人，令人懷疑係咪有人想將反對聲音「滅聲」。
昨又25人上門斥千古罪人
然而，聲討漢奸黎嘅行動未因禁制令出現而稍息，繼日前兩批示威者先後以「快閃」及「步操式」抗議後，尋日早上七時半左右，再有廿五人帶同「黎智英 千古罪人」、「黎智英 佔中黑手」、「黎智英 漢奸賣國賊」等標語，自發踩上漢奸黎寓所外示威，期間有保安員向示威者派發法庭文件，但示威者拒接，保安員將文件放喺地上，據稱曾有人踩中法庭文件。
對於有示威者一度踩中法律文件，有法律界人士分析，如有人違反法庭禁制令繼續喺漢奸黎寓所外示威，或明知係法庭文件仍故意踐踏，可因藐視法庭罪被判入獄或被法庭罰款，但佢同時提及，示威者可以不知情作辯解。佢話︰「就算你搵人喺現場派啲法庭文件畀啲示威者，但如果示威者以唔知咩文件而唔接，或者以唔知咩文件為由而踐踏文件，因為佢唔知情，就好難控告藐視法庭罪。」
其實，漢奸黎係五十步笑一百步，仲記得兩年前歷時七十九日嘅違法佔領行動，佢喺佔鐘區「皇座」抽水兼扮指揮，佢聯同其他佔領人士均對當時金鐘一帶交通大混亂有責，當時佢阻住人哋，又覺得冇問題，依家有人喺佢寓所外表達意見示威抗議，佢就以另一把尺行事，申請禁制令禁止任何人喺佢寓所外示威，話佢唔係雙重標準都無人信嘞！
發噏風話「傳媒死路一條」
此外，漢奸黎喺旗下雜誌專欄又發噏風，竟話傳媒只係做新聞，唔細味民間，又形容傳媒係離地同信唔過，最後更稱「傳媒反正死路一條」，因為傳媒新聞客觀性，同今日手機個人化嘅親切唔融合。漢奸黎旗下傳媒成日被批評報道失實，部分更惹上官非，佢要一刀切講到好似「傳媒已死」，佢自己死自己事啦，仲講到全部一齊死，絕對係零公信力囉！