中環出更：戴黨徽惹爭議 梁君彥鬼祟除低
立法會主席梁君彥早喺當選立法會主席之前，除咗要處理國籍問題外，亦辭去所屬政黨經民聯主席一職，但爭議仍然未減。佢尋日主持立法會會議時，就因為佩戴咗該黨徽章而惹起質疑，最後竟靜悄悄地除低政黨徽章，繼續主持會議。
被質疑欠公正
議員羅冠聰喺立法會會議中，兩度提出規程問題，認為主席需要維持公正性，質疑梁君彥佩戴其所屬政黨徽章嘅做法，希望梁君彥能夠除低個政黨徽章，以示公正。之不過，梁君彥兩度裁定羅冠聰所提出嘅並唔係規程問題，只係叫羅冠聰坐低，完全冇理會。
雖然梁君彥喺會議廳內冇理會羅冠聰嘅要求，但個政黨徽章竟然喺佢用膳後、重返會議廳時，離奇消失。梁君彥今次冇企硬，反而鬼祟除低個政黨徽章，似乎都係唔想再惹爭議，畀羅冠聰咬住唔放喇！
卓妮