中環出更：懷舊之夜名人重拾童年回憶
除咗衣着之外，化妝可以話係另一個見證及區別唔同時代嘅特徵，早前香港化粧品同業協會周年晚宴就以懷舊嘅「香港創造」為題，一班理事着晒懷舊裝扮現身，仲大玩經典遊戲，好似用筷子挑戰夾波子、擲氣球等玩意過吓癮，彷彿時光倒流幾十年前，一齊重拾童年回憶。
卓妮見莎莎主席郭少明一家非常配合主題，郭少明拎起支假煙斗、戴住副墨鏡，同太太郭羅桂珍企喺影樓布景板前面擺甫士，入型入格好過癮，而佢個女即協會理事長郭詩慧（Melody）就同老公陳振邦扮踩單車，別有一番風味。講起通常照片中嘅化妝，大概都睇得出係乜嘢年代，郭詩慧就話五十年代興上揚眼線配紅唇，而今年就興酒紅色唇膏，仲話今年晚宴主題食正早前電視劇風潮，大家都湧現唔少親切回憶，好似掟香口膠咁，陳振邦就話潛公仔紙印象最深刻。
陳泳聰夾波子神手
另一邊廂，理事洪玉芝就同老公、威威洗衣粉億豐行總經理陳泳聰玩限時鬥快夾波子，見佢夾親都中，非常開心，佢老公就話童年時同啲同學仔玩吓彈波子又一日，唔需要太多物質已經好滿足，非常懷念。
出席嘅仲有協會會長何紹忠（Joseph）、「美容教主」CMM國際集團董事長鄭明明、立法會議員邵家輝同理事陳錫銘及太太王麗貽等。Joseph話過去一年協會除咗到訪馬來西亞、廣州及上海外，仲透過資歷認證肯定業內從業員的質素，又成立青委會舉辦唔同嘅講座。而喺內地有五十幾間美容院嘅陳錫銘就話，北京等氣候乾燥嘅地區對美容需求較高，而香港租金則太貴喎。
卓妮