今屆立法會開始時，民主派同建制派互不相讓，為爭奪各個事務委員會嘅正、副主席職位，不惜「冧友」加入各個委員會。不過，選戰一結束，就頻頻出現退會潮，雙方都不停有人退會。而工聯會喺退會方面都好團結，因為五位工聯會立法會議員聯名去信，申請退出資訊科技及廣播事務委員會，果真共同進退喎。
工聯會五名立法會議員黃國健、麥美娟、郭偉強、陸頌雄同何啟明，喺信中話自開局以來公務甚為繁重，為調節工作安排而決定退出委員會。委員會主席葛珮帆已接納佢哋嘅申請，現時委員會只剩下三十四名議員，而工聯會更加係完全冇代表喺裏面。
翻查上屆紀錄，麥美娟曾喺一五至一六年度短暫加入過資訊科技及廣播事務委員會，但喺今年一月中退出，而其餘三年都冇工聯會成員加入，所以相信五人一齊退出，亦唔影響工聯會喺議會內嘅工作。